આ વર્ષ નો ક્રિકેટ વર્લ્ડ કપ ફિક્કો લાગે છે. છેલ્લી એકાદ બે મેચ બાદ કરતા ભારત રમતું હોય તોય ટેમ્પો જામતો હોય એવું લાગતું નથી.
ભારત એ દેશ છે કે જ્યાં ક્રિકેટ ને માત્ર ધર્મ માનવામાં આવે છે એટલું જ નહીં , એવો ધર્મ મનાય છે કે જે આટલી વિવિધતા ધરાવતા દેશ ને એક તાંતણે બાંધે છે. એમ કહેવાય છે કે We eat Cricket , sleep Cricket , live ક્રિકેટ . આપણે એવા દિવસો પણ જોયા છે કે જ્યાં મેચ હોય ત્યારે ઓફિસે પાંખી હાજરી હોય , રસ્તાઓ સુમસામ હોય, ઘરે ઘરે ભારત ની જીત માટે પ્રાર્થના હવન અને દીવાઓ થતા હોય , માનતાઓ મનાતી હોય , આખો પરિવાર અને મિત્રો સાથે બેસી ને આ રમત માનતા હોય અને જો કોઈ હલે અને વિકેટ પડે તો એને જે તે પરિસ્થિતિ માં ફિક્સ કરી દેવામાં આવે. વર્લ્ડ કપ જીતીએ કે નહીં , પાકિસ્તાન ને હરાવીએ એટલે સરઘસો નીકળતા હોય , ફટાકડા ફૂટતા હોય , થાળી વાડકા ના અવાજ થી શેરીઓ ગુંજતી હોય, મને તો એવા વર્લ્ડ કપ પણ યાદ છે કે જેમાં આપણી મેચ ના દિવસો માં જ જો કોઈના ત્યાં પ્રસંગ હોય તો મહેમાનો હાજરી આપે એ માટે થઇ ને યજમાન ખાસ સ્ક્રીન મુકાવતા જેના પર મેચ નું લાઈવ પ્રસારણ જોઈ શકાય,,,,, આ બધું જ આ વર્લ્ડ કપ માં મિસિંગ છે.
ઘણા કારણો હોઈ શકે આમ થવાના, શું આપણો ક્રિકેટ પ્રત્યેનો ક્રેઝ ઘટ્યો છે? કે હવે આપણી પાસે ક્રિકેટ માટે પણ સમય નથી? કે આપણી પર ઇન્ફોરમેશન અને એન્ટર્ટેઈનમેંન્ટ નો એવો મારો થયો છે કે આપણે આ દરેક માંથી રસ ગુમાવતા જઈએ છીએ ! કે પછી T – 20 ફોર્મેટ ના કારણે ક્રિકેટ નો જ ઓવરડોઝ થઇ ગયો છે? કે પછી ભારત ની સામાન્ય ચૂંટણી અને નવી સરકાર ની રચના માં માહોલ એટલો બધો ગરમાયેલો હતો કે એની ચમક આગળ વર્લ્ડ કપ વિસરાઈ ગયો?
આમાંથી કે આ સિવાય તમારું બીજું કોઈ પણ કારણ હોય , એક વાત નક્કી છે કે ક્રિકેટ માં જેટલા પૈસા વધ્યા છે એટલી જ એની ચમક ઘટી છે.ટીમ ઇન્ડિયા રમી રહી છે , સારું રમી રહી છે , પણ મેચ જોતી વખતે જે શૂરાતન ચડવું જોઈએ એ હવે નથી ચડતું , હવે દરેક વિકેટ પર માનતાઓ રાખવાનું મન નથી થતું. મેચ જોતા કદાચ ઇન્સ્ટાગ્રામ કે ફેકબુક ની સ્ટોરીઝ જેટલી મજેદાર લાગે છે એટલી માજા ખરેખર માં આવે છે? આ વખત ની મૌકા મૌકા વળી એડ્સ પણ ફિક્કી લાગે છે.
અને છેલ્લે,
આ બધું જ હોવા છતાં દિલ થી એમ જ છે કે ‘ જીતેગા તો ઇન્ડિયા હી.’
